Khawsak harsa ṭanpui nan CMRF sum Rs. 91,50,000 pek chhuah a ni dawn
Chief Minister’s Relief Fund (CMRF) hman dan tur ngaihtuahtu, Committee on Utilization of Chief Minister’s Relief Fund for Covid-19 chuan, total lockdown kalpui mekah, khawsak harsate ṭanpuina atan CMRF for Covid-19 aṭangin Rs. 91,50,000 pek chhuah an remti.
Committee on Utilization of CMRF for COVID-19 chu nimin khan an chairman Lalnunmawia Chuaungo, chief secretary hoin CS Conference Hall-ah an ṭhu khawm a; additional chief secretary JC Ramthanga, Finance secretary Vanlalchhuanga, NGO Coordination Committee chairman Vanlalruata leh Mizoram Kohhran Hruaitute Committee secretary Rev. R Lalrinsanga te an tel a ni.
Meeting chuan, April 20, 2021 aṭanga inkhuahkhirh leh inkhârkhip vanga harsatna tâwk chhungkuate ṭanpuina atan Rs. 91,50,000 sem chhuah an remti a; CM Relief Fund sem chhuah tur chu district hrang hrang DC-te kutah pek tur a ni a, DC-te'n khawsak harsate hnenah an pe ang.
CMRF sum chu Aizawl district-ah Rs. 61,50,000, Lunglei leh Kolasib district-ah Rs. 5,00,000 ve ve leh district dang zawngah Rs. 2,50,000 ṭheuh pek tura rèl a ni a; CMRF aṭanga chhawmdawlna leh mamawh dang atana sum pek chhuah zel dan tur chu a ṭul ang leh district tina DC-te rawtna hmuh dan azirin ngaihtuah tur a ni.
Ṭhutkhawma tarlan danin, May 16, Pathianni thlengin CMRF for Covid-19 ah Rs. 22,98,84,954 a lut tawh a, Rs. 21,33,60,970 hman tawh niin, la hman loh Rs.1,65,23,984 a awm. Rs. 1,65,23,984 aṭangin Rs. 91,50,000 pek chhuah a nih chuan Rs. 73,73,984 a la bâng dawn a ni.
Aizawl bikah chhuanchham chhungkua DC-a hriattir 3,074 an awm tawh tih tarlan a ni bawk.