Raw-mi chi supply-na tur tender sût turin Lalsawta'n sorkar a ngen

Mizoram Pradesh Congress Committee (MPCC) vice president Lalsawta chuan nimin khan press statement a tichhuak a; Raw-mi chi (Dendrocalamus Sikki­mensis seedlings) supply-na tura tender tih­chhuah tawh chu sût turin Mizoram sorkar a ngen.

MPCC Vice President chuan, Mizoram sorkarin May 7, 2021 khan Rawmi chi supply-tu tur zawn nan tender a chhuah tih tarlangin, "A hriate sawi danin, Rawmi hi Zo bâwm ngaw thing lianpui kara awm chi a ni a, a chìn hi thlai leh thing dangte aia harsa tak a ni. Kan ngaw neih ang ang, Mizoram hmun hrang hrangah hian chíng hlawhtling tehreng pawh ni ila, a lâk khawm chu thil harsa tak tur a ni," a ti.

Covid-19 hripui léngin nasa taka ram leh mipui a nuai avangin mi tlawmngaihte'n an theih ang ang thawh khawmin hripui do mek a nih thu sawiin Lalsawta chuan, "Chutih laia sorkar sum heti záwnga lo hman tum hi mipui pawh an zahawm hle," a ti a; state hausa zawk, Chhatisgarh pawhin Covid-19 lèn hmaa Governor leh CM bangla, legislative assembly complex leh officer rual luah tur tam tak sak tuma tender an chhuah tawh pawh an sût vek thu a sawi.

Finance minister hlui Lalsawta chuan, Rawmi chi supply-na tura tender chhuah tawh chu sût ngei turin MPCC-in sorkar an ngen tak zet tih sawiin, "Tender thehluh theih ni hnuhnung ber pawh June 1, 2021 daih khi a la ni tho. Sorkar pawisa kan tih hi central leh state sorkarah pawh mipuiin chhiah hmanga an thawh khawm a nih avangin a hman danah mipui mitmei vèn a ṭul hle a ni," a ti.