Covid-19 vei zinga mi 2 an thi

Nimin zing khan Mizoramah Covid-19 vei mi pahnih an thi a, sorkar chhinchhiah angin Mizorama hripui vei thi tawh zawng zawng chu mi 26 an ni.

Sorkar thuchhuah tarlan danin, Pathianni zan zanlai pelh hnu, nimin zing dar 1:30 vel khan Covid-19 positive Zathangpuii (74), Thing­dawl, Kolasib district chu a thi a, nimin chhun khan vui nghal a ni.

Thu dawn danin, Za­thangpuii hi a pasal nen Rapid Antigen Test hmanga May 16, Pathian­nia Kolasib District Hospital-a endiknaah Covid-19 vei a ni tih hmuh chhuah a ni a, Pathianni zana State Referral Hospital (ZMC)-a enkawl tura hruai an nih laiin Zanlawn dáiah a thi a ni.

Nimin vêk, zing dar 2:30 khan Mangdin (61), Chhinga Veng(w/o Chiahmunga, Tahan, Myanmar) chu Covid-19 vei a nih avanga enkawlna hmun SRH-ZMC-ah a thi a, nimin chawhma dar 10 vel khan thlànmualah vui a ni.

Sorkar thuchhuah tarlan danin, Mangdini hi thisen sang, zunthlum leh natna benvawn dang nei tel a ni a; May 16, Pathianni khan RAT hmanga a sample endiknaah hripui vei a ni tih hmuh chhuah niin, SRH-ZMC ICU-ah dah luh nghal a ni.

Chhinga Vengah hian nimin tlai thleng khan hripui mi 271 hmuh chhuah a ni tawh a, mi 129 chu dam takin an chhuak tawh a, mi pakhat thi tawhin, enkawl mek mi 141 an awm.