KHAWTHLIR

CM Relief Fund
Chief Minister's Relief Fund for COVID-19 ah nimin khan Chief Minister, Dy. Chief Minister, Speaker, Dy. Speaker, cabinet minister panga, minister of state panga leh MLA 16-te'n an hlawh aṭangin Rs. 15,000 ṭheuh an thawh a, MLA 30-te pawisa thawh belhkhawm chu Rs. 4,50,000 a ni. Nimin vêk khan CMRF-ah hian UPC (Mizoram)-in Rs. 8,00,000 leh Ramhlun Venglai Presbyterian Kohhranin Rs. 1,00,000 an thawh bawk a; nimina CMRF-a sum thawh zawng zawng chu Rs. 13,50,000 a tling. Nimina sum thawhte nen hian CMRF for Covid-ah Rs. 23,12,34,954 a lut tawh a, Rs. 21,33,60,970 hman tawh niin, la hman loh Rs.1,78,73,984 a la awm.

Containment area

Kolasib district magistrate Dr H Lalthlangliana chuan, Seṭhawna Jordan Centre chu Covid-19 containment area-ah nimin khan a puang. Hemi chungchanga thupek hian April 30, 2021-a containment area-a a lo puan tawh chu a luahlân ang. Containment area hian Jordan Centre compound leh office a huam a, residential area (quarters) a huam lo thung.

Dulte leh Kawlkulhah Kawngpui ping dawn
Kawlkulh leh Dulte Joint NGO Coordination Committee hruaitute chu May 16, Pathianni khan Dulte community hall-ah an ṭhukhawm a; Dulte leh Kawlkulh rama NH-6 by-pass road pênna laiah vawiin hian kawng pin hnatlang neih an rêl. Kawlkulh leh Dulte Joint NGO chuan, NH-6 by-pass road siamna tur Kawlkulh, Kawlkulh North leh Dulte Joint VC ṭhukhawmin ram lâk an phal lo chu lawmawm an tih thu an tarlang a; by-pass kawngpuiin a paltlang tur ram neitute'n an dodalna chu a tàwp thlenga thlàwp an tum thu an sawi bawk.

Vaccine pe tan
Nimin khan Aizawlah kum 18-44 inkarte hnenah Covid-19 laka invênna damdawi, Covishield pek ṭan a ni a, naktuk hian Kolasib district-ah pawh pek ṭan a ni dawn. Kum 18-44 inkar, Covid vaccine pek turah hian a dawng hmasa tura sorkarin a tihte hnenah pek a ni a, mipui náwlpuiah pek a la ni lo. Vaccine la turte chu selfregistration.cowin.gov.in-ah inziah luh hmasak tur a ni.