LICI pek PPE 1,400 inhlân

Rural Development (RD) department-in Life Insurance Corporation of India (LICI) corporate social responsibility kaltlanga personal protective equipment (PPE) an dawn zinga 1,400 chu nimin khan RD minister Lalruatkima'n Health minister Dr R Lalthangliana hnenah a hlàn.

Lalruatkima chuan, Mizoramin Covid-19 a hmachhawnah RD department chuan an ṭangkai ve theih dan tur kawng an dap thu sawiin, "Mumbai-a LICI headquarters-ah CSR kaltlangin Mizoram tan hma la turin kan ngen a, PPE leh three-layer mask tam tham tak min pe a ni," a ti a; hmai tuamna chu task force duty-te hnenah leh PPE eng emaw zat chu community covid care centre (CCCC) hrang hrangah an pek tawh thu a sawi.

Health minister Dr R Lalthangliana chuan, PPE full kit (PPE suit, pheikhawk khuhna, mask, face shield, waste bag) 1,310 leh PPE suit 90 an dawng chu a lawm thu a sawi a, "PPE hi engtik lai pawhin kan mamawh a, eng emaw zat kan chah mek. A rawn thleng thei lo bawk nen, kan mamawh zual lai taka kan dawng hi a lawmawm tak zet a ni,"a ti.

Dr Lalthangliana chuan, ZMC-ah ni tin PPE 200 vel mamawh a nih thu sawiin, "CCC, quarantine centre leh frontline worker-te'n an mamawh reng bawk. ZMC-ah phei chuan khum eng emaw zat dah belhna tur ward thar kan hman hunah 200 aia tam fé ni tin kan mamawh dawn a ni," a ti a, RD department leh LICI chungah an lawm thu a sawi.

Health Minister sawi danin, ZMC-a RT-PCR laboratory atana hman mek TB laboratory chu hman a ngai tawh lo a, ICMR-in Virus Research and Diagnostic Laboratory (VRDL) a bun tawh. Thawktu scientist bakah staff eng emaw zat kum thum chhung rawih an tum bakah, RT-PCR test kit 25,000 a thlâwnin a pe nghal bawk.

ZMC VRDL-ah hian RT-PCR leh RNA-extractor pathum ve ve hmangin swab sample endik ṭhin a ni.