FPE-in frontline worker-a telh turin ngen

Federation of Provi­sional Employee (FPE) chuan nimin khan chief minister Zoramthanga hnenah lehkha thehlutin, Mizoram sorkara pro­visional employee leh muster roll zinga Covid-19 donaa thawk (duty)-te chu frontline worker-a telh turin an ngen.

Vanglaini zawhna chhangin FPE President chuan, provisional employee leh MR, Covid-19 donaa duty zat chiah an la hriat theih loh thu a sawi a; chutih rualin, an duty-na aṭanga hripui kái tawh an awm tih a sawi bawk.

FPE chuan an lehkhaah, "Keini hi hlawh hniam tak leh security nei lo kan ni. Chutih rualin, kan duty-na aṭangin hri kái ve thei tho kan nih avangin kan dinhmun hi a hlauhawm em em. Chuvangin, kan zinga executive duty-a telte hi frontline-ah min telh a, positive palh pawh ni ila, enkawlna senso min tumsak tur leh thihna hial kan tâwk a nih pawha sorkar aṭanga hamṭhatna awm thei ang min siamsak ve turin kan ngen che a ni," an ti.

Mipui mamawhna avangin provisional employee leh MR zingah medical leh force mi ang chiahin hripui léng karah duty lo thei lo an awm tih sawiin FPE chuan, "Tui sem, meter reader, counter-a ṭhu, tui pump leh transformer duty, PWD labour leh Vety department-a mite chu Pathianni pawh âwl loa farm kalte leh Vety dispensary-a thawkte hi hlawh tlem tê tê leh security nei miah lo kan ni," an ti a; chutiang mite chu frontline worker-a dah turin an ngen a ni.

Sorkara thawk nghet (regular)-te leh provisional employee leh MR-te chu hlawh a inthlau a, tehkhin chi an ni lo tih sawiin, Covid duty tura regular employee leh provisional employee-te sorkarin a hrût rual chu siamṭha turin Chief Minister an ngen.

FPE chuan, "Provi­sional employee-te a hlauhawm lai ber Covid care centre hrang hrangah zan 14 riak lut-a duty tir min tum hi mak kan ti hle a ni," an ti a; sorkar aṭanga hlawh chiah la, hamṭhatna dang dawng lo an nihna chu hriatsak a, zan riaka duty tir lo turin an ngen bawk.

Covid-19 léng chungchanga sorkar hmalaknate theihtawpa thláwpin, an tih ve theihah chuan ṭhahnemngai takin an thawk tih sawiin FPE chuan, "A theih chin chinah ṭan lak zel pawh kan tum. Kan ngenna hi min ngaihtuahsaka min tihhlawhtlinsak turin kan ngen che a ni," tiin Chief Minister an ngen a ni.