KHAWTHLIR

Tahan Mizo Ṭhalai Pawl (TMṬP) chuan thu­chhuah siamin, COVID-19 vanga Mizoram mipuiin buhfai leh ei leh ina harsatna an tâwk palh a nih chuan, Myanmar-a Mizo ṭhalaite'n tih theih an neih chuan theihtawp chhuah zel an tum thu an tarlang a, "Zoram mipui unaute mangang leh chî-âi lo turin kan ngen a che u," an ti.

Nazareth, Lawngtlai ṬKP unit chuan nimin khan Lawngtlai District Hospital tan thisen unit 17 an pe a, a petute mipa 14 leh hmeichhia pathum an ni.

Vaivakawn Cultural Centre cum-Auditorium Building chu March 9, Thawhṭanni khan deputy chief minister Tawnluia'n a hawng. In hawnna inkhawmah hian bialtu MLA Lalruatkima pawh a tel. In sak nan hian cheng nuai 619 ruahman a ni a, December 20, 2013-ah sak ṭan niin, September10, 2019-ah sak zawh a ni. A vaia a zau zawng chu sq.metre 2850.03 a ni.

Nimin, March 10 kha Hindu kut pawimawh, Holi (rawng intheh kût) a ni a, India ram pumah lawm ṭhin a ni. Kum­inah chuan COVID-19 leng mek avangin Holi hi Mizoramah chuan a hranpa a lawmna siam a ni lo. Holi hi India ram pumah sorkar chawlh a ni.

Mamit District Level Centre for Women (DLCW) leh One Stop Centre (OSC) chuan March 9, Thawhṭanni khan International Wo­men's Day an hmang. He ni pual hian zing karah marathon buatsaih niin, hmeichhia eng emaw zat an tel a, chhunah IPR conference hall-ah inkhawm an buatsaih.

March 9, Thawhṭanni tlai dar 5 vel khan Lung­lei Kikawn bulah chhuk zawnga tlân 407 truck-in scooter, bike leh auto-rickshaw eng emaw zat leh mihring a hnâwl a, mi pakhat a thi. Lunglei police hotute aṭanga thu dawn danin, truck khalh­tu hi hnam dang a ni a; mihring a hnâwl zinga mi Vanneia Hnamte (70), Chanmari, Lunglei chu Christian Hospital thlenpui a nih hnuah a hliam tuar loin a thi. Mi dangte erawh chu an hliam na lo thung. Truck driver chu police-in an man nghal a ni.