Kângmei chhuak chhuina sawiho

April thlaa hmun hrang hranga kângmei chhuak chhui chiang tur leh chumi kaihhnawiha dan ding laite zir chiang a, a ṭul anga hmalak dan tur rawtna siam tura Mizoram sorkarin a din, Special Investigation Team (SIT) on Fire Outbreak leh Lunglei district sorkar hotute chuan nimin khan hmalak mek dan leh hmachhawpte an sawiho.

Lunglei DC Kulothungan A tarlan danin, tun hnaia Lunglei district-a kângmei chhuak chuan chawhrualin VC 32 huam chhunga ram hectare 2,061-a zau a awh a, Lunglei Zotlang VC-in kângmei tuar nasa berin, ram hectare 600 a kânga chhût a ni. Kângmei chhuah nasat lai hian Lunglei khawpuia chhungkua 51 chu inthiar chhuahtir ni mah se, in leh lo chán an awm lo.

Lunglei SP Rex Zarzoliana Vanchhawng sawi danin, Lungleia kângmei chhuah ní, April 24, 2021 khan Lunglei police-a Intelligence Branch-in kângmei chhuah nía rama kal nia hriat mi pali chu thu an zawtfiah nghal. April 27-ah Lunglei SDPO Lalfakmawia kaihhruaiin Special Investigation Team din a ni a; ram kâng chungchangah Lunglei Police Station-ah FIR thehluh a ni bawk.

Meeting-ah hian, kângmei chhuah thulha rang zawka chêt a nih theihna tura hmalakna tur ṭul te, bungraw mamawh te, mipui zirtirna kalpui dan tur te, kângmei ṭhelh tura mi thlan chhuahte training pek dan tur te, kângmei a chhuaha rang taka mipuiin report an thehluh theih dan tur te, technology hman ṭangkai theih dan turte leh, YMA leh khawtlang hruaitute leh mipui thawhhona ṭha a awm theih nana hmalak zel dan turte sawiho a ni.