Vegetable supply chain kalpui phût

ZPM ṭhalaite chuan, Mizoramah thlai man sang lutuk tur vènna atan leh a man a mumal zawk theih nan Mizoram sorkar chu vegetable supply chain kalpui turin an phût.

ZPM Ṭhalai thuchhuah chuan, Aizawlah lockdown avangin thlai hnah leh rah man a sáng hle a, mipui mimirin hna an thawh theih loh laia khawsak phunga harsatna a belhchhah nasa tih a tarlang a, "Kut hnathawktute'n lockdown avangin an thlai man an tihto phah lo nia hriat a ni," a ti a; thlai thartu leh a leitute inkarah thil fel lo eng emaw a awm ngeia a lang thu a tarlang.

Thlai man chungchangah sorkarin ruahmanna felfai tak siamin kalpui se, awlsam takin harsatna a pumpelh theiha an hriat thu sawiin ZPM ṭhalaite chuan, "Sorkar hian vegetables supply chain mumal tak siama kalpui ngam tur leh thil man mumal taka bithliah ngam turin kan ngen a ni," an ti.

ZPM Ṭhalai chuan, Sairang Dinthara Cold Chain Development Project hmanga cheng nuai 250 hmanga siam leh kawlphetha pawh cheng nuai 16.72 sénga bun tawh Horticulture Cold Storage hman ṭangkai loha a awm reng chu a pamhmái hlea an hriat thu an sawi a; kháwl chu a hmanna tur dik taka hmang thuai turin Mizoram sorkar an ngen a ni.