MNF-a beisei neite an beidawng ṭan - Zodintluanga

Congress Legislature Party leader Zo­dintluanga Ralte, MPCC treasurer ni bawk chuan, Assembly inthlan dawna MNF-in cheng nuai thum sem an tawktarh vanga MNF-a beisei neite chu tunah chuan an beidawng leh ṭan tawh niin a sawi.

Zodintluanga Ralte hian nimin khan a bial, Thorang constituency chhunga khaw hrang hrang a fang a; Déngsur, Khawlêk, Changpui, Thénhlûm leh Tleu-ahte van­tlang inkhawmah thu sawiin, "Ram pumah MNF-a beisei nei an voter-te tunah chuan an beidawng ta mek a ni," a ti.

Mizoram Assembly inthlan dawnah MNF president Zoramthanga'n, an sorkar chuan cheng nuai thum an sem tur thu a sawi avangin mi tam takin cheng nuai thum dawn duhin MNF an vote tih a sawi a, "Beiseina sang tak an nei a, mahse, an sorkar hnuah Assembly House-ah cheng nuai thum an sem loh tur thu an sawi leh ta hlawm si a, an beidawng hle tawh a ni," a ti. Mipui tibeidawng zual turin kumina Mizoram budget-ah hmasawnna hmuh tur a awm loh thu a sawi.

Zodintluanga chuan, "Mizoram budget thara mipui hmasawnna leh mipui chan turahte hmasawnna hmuh tur a awm lo hian mipui a tibeidawng em em a, an flagship programme SEDP pawisa dahte a tlem zawk zel hian a zir chiang mite nasa takin sorkarah hian an beidawng a ni," a ti.

Congress Treasurer chuan, MNF sorkarah hmasawnna hmuh tur a awm lo nia sawiin, "Congress sorkar sum hman bàn ṭhahnem tak MNF khan renchemna tel loin nawmchen pah­in an hmang a, an han hmang zo a, budget an han nei ve a, Mizoramah hmasawnna hmuh tur a awm lo. Sumah kan harsa nghal hle ringawt a ni," a ti a; MNF sorkarin anmahni puala budget an siam ve hnuah hmasawnna a kal theih tawh loh thu a sawi.