KMMTTP siam hna 94.20% zo tawh

Information & Public Relations (IPR) department chuan Lawngtlai district MJA member-te tan nimin khan Project Site Visit an buatsaih a, Kaladan Multi-Modal Transit Transport Project (KMMTTP) kawngpui siam mek leh Hruitezawl khaw bul Chhimtuipui luia lung mak an tlawh. KMMTTP kawng siam hna chu 94.20% zawh tawh a nih thu tarlan a ni.

KMMTTP kawngpui siam mek ennaah hian PWD Multi Modal Project Division hnuaia kawng package hrang hrang enkawltu engineer-te leh hna thawktu contractor-te'n an lo dawngsawng a; Hruitezawl khawtlang hruaitute leh tlawmngai pawl hruaitute'n lung mak (Castle of Beino) an tlawhnaah an lo dawngsawng ve bawk.

KMMTTP kawng siamah hian Mizoram chhung bika siam tur chu km. 88 a ni a, blacktop tur bik chu km. 87 niin, hmun pariatah lei dawh tur a ni. Kawng siam tur chu hlâwm (package) pathumah ṭhen a ni a; RDS company-in package-I (km. 0-35) leh package-III (km. 60-88) an siam a, package-II (km. 35-60) chu Atlanta-ARSS company-in an siam thung.

Kawng siamnaa hna thawh tur zawng zawng zinga 94.20% thawh zawh tawh a nih thu leh, a hun taka hna zawh a nih theih nan ram chung­changa buaina awm chu thuneitute'n chingfel thuai se an duh thu, kawng enkawltute chuan an sawi. Project visit-ah hian Lawngtlai IPRO C Lalhruaitluanga leh Lawngtlai MJA president Lalngheta Ralte hoin MJA member eng emaw zat an tel a ni.