Mizoram sorkarin sorkar hnathawkteMay thla hlawh a pumin pe dawn Hlawh bat ṭhen hun tur la tifel lo
Mizoram sorkar chuan sorkar hnathawkte hnenah May thla hlawh a vaiin a pe dawn. Hetih lai hian, sorkar hnathawkte hlawh bat ṭhensak
ṭan hun tur leh bat ṭhen zat tur tihfel a la ni lo.
Finance department hotute hnen aṭanga thu dawn danin, sorkar hnathawk hlawh bat ṭhensak hun tur leh bat zat tur chu tihchian mai theih a la ni lo. Sum dinhmun thlir chungin uluk taka ngaihtuah tur a ni a, sorkar laipui
aṭanga state sum hmuh tur angte hmuh zel theih a nih chuan hlawh batsak kher a ngai lo mai thei.
May thla hlawh bik chu a zavaiin pek chhuah tur a ni a, department ṭhenkhat chu Treasury lamin an pe chhuak tawhin a rinawm. Central aṭanga sum hmuh zat tur hriat a la nih loh avangin June thla hlawh bat ṭhen a ngaih dawn leh dawn loh sawi lâwk theih a la ni lo.
Sorkar hnathawkte hlawh bat ṭhensak chu Cabinet pawmpuina neih lâwk ṭul tih a nih thu sawiin Finance department hotute chuan, "Kan sum dinhmun ṭha loin, sorkar hnathawk hlawh bat ngai thut se a buaithlak dawn. Cabinet phalna kan neih sa chuan thil tih a awlsam phah dawn a ni," an ti.
Tarlan tawh angin, May 22, 2020-a Council of Minister ṭhukhawm chuan Committee on Economy Measure-in rawtna an neihte an ngaihtuah a,
ṭhenkhat tidanglamin an pawm.
Committee on Economy Measure-in rawtna a siam dan chuan, sorkar hnathawk group A hlawh (basic pay) aṭangin 15%, group B aṭangin 10%, group C leh D-te hlawh aṭangin 5% chu thla thum, June-August 2020 chhung bat ṭhensak rawt a ni.
Committee rawtna chu Cabinet meeting-in an siam rem a, group-D leh a hniam lam deuhte chu ngaihhnathiam an remti a; hlawh bat ṭhen hun leh bat zat tur chu sum dinhmun thlir chunga Finance department ruahman turin an dah a ni.