Minister, MLA leh councillor-te'n Covid-19 ven dan tur an sawiho : 'Save Aizawl City' tih a hun tawh - Health Minister

Health minister Dr R Lalthangliana hoin nimin khan Aizawl khawpui chhung bialtu MLA-te leh AMC councillor-te'n Aizawl khawpuia Covid-19 darh chak lutuk vên dan tur an sawiho. Minister chuan, thupuiah 'Save Aizawl City' tih hman a hun tawh thu a sawi.

Health Minister chuan, online hmanga chinfel leh rèl rem lo a awm ṭhin avangin inthlahrung taka meeting an koh ṭhin thu sawiin, "MLA leh councillor-te'n theihtawp in chhuah tih ka hria a, thawhhona a ṭhain ruling leh opposition tih sawi loin kan ṭang tlang a, a lawmawm hle. Covid-19 ah hian inthliarna a awm thiang lo a, chutiang tur chuan beih a ngai," a ti.

Nikum lama lockdown puan a nihin hripui vei hmuh chhuah a tlakhniam ṭhin thu sawiin Dr R Lalthangliana chuan, "Kumina second wave-ah hi chuan a tlahniam hleithei lo a, a buaithlak khawp mai. Indonaah chuan silai tin zâwn lam a hriat theih a, tuna kan rál beih hi chuan tin zâwn bik pawh a nei lo," a ti a, rin dan anga kal tawp mai a ṭul ṭhin thu a sawi.

IDSP Dr Pachuau Lalmalsawma tarlan danin, May 1-16, 2021 chhungin Mizoramah Covid-19 vei mi 2,627 hmuh chhuah a ni a, chung zingah 1,566 (59.61%) chu AMC huam chhunga hmuh chhuah an ni.

Mi 210 chu AMC páwn lam, Aizawl district-a hmuh chhuah a ni a; a bak zawng mi 851 (32.39%) chu Aizawl district pawn lama mite an ni.

Contact tracing team aiawha thu sawitu DIG (NR) Lalbiakthanga Pachuau chuan, zir chiannaa a lan danin, ṭhenawm khawvéng leh chhungkhat inlènpawh nasa lutuk chu hripui darh nasat chhan zinga mi a nih thu a sawi a, "Hun rei lo te chhung hi chu ṭhenawm khawvéng leh chhungkhat pawh, in khata chengho ni lo chu i inlèn pawh lo ang u," a ti.

Meeting-ah hian MLA zingah Aizawl North-I bialtu Vanlalhlana, North-II bialtu Dr Vanlalthlana, East-II bialtu Robert Romawia Royte, West-II bialtu Lalruatkima, West-III bialtu VL Zaithanzama, South-I bialtu C Lalsawivunga leh South-II bialtu C Lalchhuanthanga-te an tel.

AMC councillor zingah MNF aṭangin mayor Lalrinenga Sailo, deputy mayor R Thanglura, executive councillor Lalringliana, ZPM aṭangin Malsawmzuala Ralte leh C Lalchhandami leh, Congress party aṭangin Rosiamngheta Ralte te an tel. Councillor-te hi punkhawm tam lohna atan bituk neiin party aiawh intir tura tih an ni.

MLA-te leh councillor-te hian an bial leh ward chhunga an hmalak dante leh harsatna an neihte an sawi a ni.