Mizoramah Covid-19 vaccine Mi 2,33,342-in an dawng tawh
May 17, Thawhṭanni thleng khan Mizoramah mi 2,33,342-in Covid-19 laka invênna damdawi Covishield an dawng tawh a, chu'ng zinga mi 51,946 chuan an dawng kim tawh.
IDSP, Mizoram tarlan danin, May 17 thlenga Covid-19 vaccine dose pek tawh zat chu 2,85,288 a ni a, hei hi dose khatna la tawh leh dose hnihna la tawhte belhkhawm niin, mihring zat chu 2,33,342 a ni.
May 17, Thawhṭanni aṭang khan kum 18-44 inkar hnenah dose khatna pek ṭan a ni a, pek mek zel a nih bakah, second dose pawh pek mek zel a ni. Thawhṭanni bika vaccine pek zat chu first dose 1,827 leh second dose 45 a ni a, an vaiin mi 1,872-in an dawng.
Covid-19 vaccine hi kum 18-44 inkar bikah chuan nimin khan print & electronic media-a thawk te, chanchinbu semtute leh bank-a thawkte hnenah pek a ni a, nimina pek zat erawh hriat a la ni lo. Vawiinah PHE department-a tui semtute leh Power & Electricity department-a power supply enkawltute hnenah pek a ni ang.
