Sikul leh hmunhma ZMC tana pekah Zirlai pawl pahnih ngaihdan a inang lo

MZP chuan, Zoram Medical College atana Muallungthu VC-te'n School Education department ram, Muallungthu Primary School leh Middle School ram leh sikulte an pe chu hriatthiam harsa an tih thu an tarlang. Mizo Students Union chuan, Muallungthu VC-te’n sikul ram ZMC tana an pek dan thuchhuah siamin an sawifiah thung.

MZP chuan thuchhuah siamin, "Muallungthu VC-te'n zirna hmun leh ramte School Education department thuneitute pawh sawipui loa ZMC hnena an pe mai hi kan hrethiam lo tak zet. School Education Director-in Muallungthu VC-te insawifiah tura May 15-a a tih ang ngeia insawifiah tur leh ram hi School Education department kuta hlàn lêt leh vat turin kan phût tlat a ni," an ti.

Zirna a pawimawh avangin ṭhangtharte tan pawha zirna hmun ṭha neih chu an duh dan a nih thu sawiin, MZP chuan, zirna ṭha Mizoramin a neih nan leh sikul ram humhim a nih theih nan theihtawp an chhuah zel dawn thu an tarlang bawk.

Mizo Students’ Union (MSU) chuan, hripui léng vanga zirna-in hawn theih a nih loh laia Muallungthu VC-te'n sikul ram ZMC hnenah an pe nia lang chu pawi an tih thu Muallungthu khawtlang hruaitute an hrilh a; "Muallungthu VC-te'n zirna hmasawnna tihkhaihlak theihna nia lang thutlukna an siam anga May 14 leh 15-a chanchin thar leh social media-a tarlan chu thu dik tâwk lo a ni tih kan hriat hnuin pawi kan ti em em a ni," an ti.

MSU tarlan danin, an hruai­tute'n nimin khan Muallung­thu VC leh zirtirtute kawmin, sikulte chu a hmunah an tlawh. Muallungthu-ah P/S pahnih a awm a, khaw chhunga mi zawkah zirlai an awm lo a, zirlai awm mekna zawk chu Falkawn nen an inrìna bula awm niin, School Education department ram, school pass no. 13 of 1978, memo no. DLR/HP/S-1/78 of 3rd May 1978 hmanga pek a ni.

Muallungthu VC-te nen an inkawmnaah VC-te chuan, zirna lama hmasawn an duh thu te, sorkar sikulah zirlai an tlèm avangin tuna sikul awmna hmunah ZMC zauhna tur ruahman theih a nih chuan pawi an tih loh thu te, department lam nen an inbe fel a nih chuan sawi theih an neih loh thute MSU hruaitute an hrilh a ni.