Ram hruaitute an bialah che chhuak

Ram hruaitute Covid-19 kaihhnawihah ṭanpuina pein an che chhuak zel a, nimin khan kawng hrang hrangin hma an la.

South Tuipui bialtu MLA Dr R Lalthangliana, Health minister chuan nimin khan a bial chhunga village task force 22 hnenah hmanrua chi hrang hrang bakah, Thingsai, Cherhlun leh South Vanlaiphai damdawi-inte hnenah Rs. 10,000 ṭheuh a pe a; chhuanchham leh harsa zual an awm chuan VTF kaltlangin inthlahrung loa amah hriattir zel turin a bial mipui a chah.

MLA Zothantluanga chuan Thawhṭanni leh nimin khan a bial chhunga veng hrang hrang a tlawh a, buhfai leh ni tin mamawh ei tur chi hrang hrang bakah, hripui donaa hman tur hmanraw ṭhenkhat semin, local task force-te hnenah a hlân a ni.

Zothantluanga hian Aizawl West-I huam chhunga Chawlhhmun CCC leh Tribal Art Centre CCC-te tlawhin, refrigerator leh an mamawh thil chi hrang hrang a leisak tawh bawk.

Lunglei South bialtu MLA Dr K Pachhunga chuan nimin khan a bial chhunga Salem veng, Lunglawn, Sethlun, Theiriat, Luangmual leh Hrangchalkawna VTF-te hnenah hmanrua chi hrang hrang leh pawisa a sem bawk.

AMC Ward-VIII councillor Christina Roluahpuii Sailo chuan, community covid care centre (CCCC)-a enkawl mekte'n an inenkawlna senso Mizoram State Health Care Society (MSHCS) aṭanga an hmuh (bill) let ve theihna turin nimin khan Health minister Dr R Lathangliana hnenah ngenna a thlen.

Ward-VIII huam chhungah hian bial local task force pathumte hmalaknaa din CCCC pakhat, Horticulture Complex, Chite Vengah a awm a ni.

AMC Ward-XVII councillor David Zohmangaiha chuan SRH-ZMC Covid ward no. 4-a hman turin walkie talkie set khat a pe. David Zohmangaiha hi Covid-19 vei a nih avangin SRH-ZMC-ah enkawl mek a ni.