KHAWTHLIR

Home tanpui
Sericulture department chuan Covid-19 lockdown vanga Aizawl khawpuia home hrang hranga harsatna tawk mekte hnenah nimin khan ei tur ṭhahnem tak an pe. Sericulture department luan chhuahna hun hi Social Welfare department kaihhruainain neih a ni a; Blessing Home, Operation Kingdom Ministry, Khawngaihna In (Chaltlang) Khawngaihna In (Chite) hnenah buhfai ip 20, alu ip 20 leh dailuah ip 8 an pe a ni.

Minister-in ZMC pe
Minister of state Dr K Beichhua chuan nimin zing khan Zoram Medical College-a thawkte leh damlote ei atan artui leh bawnghnute a pe. Dr K Beichhua chuan, hri léng do hneh turin mipuiin an mawhphurhna ṭheuh an hlen a ṭul thu a sawi. Minister-in ZMC hnena a pek hi ZPDS, Tanhrila thar artui plate 20 leh MULCO bawnghnute litre 200 a ni.

CADC EM la lut
Chakma Autonomous District Council (CADC)-a MDC pahnih, Bubon Kumar Chakma leh Sanjeev Chakma te chu executive member (EM) atan nimin khan lâk luh an ni. MDC pahnihte hi April 30, 2021 khan EM atan lak luh tum a ni a, mahse home quarantine ngai an nih avangin a hun sawn niin, nimin khan Chawngte SDO Dr Manesia Khaimeichho chuan rinawmna thu tiamtirin a la lut a ni.

Covid-19 vangin Delhi-ah Mizo 2 thi
Nimin khan Delhi-ah Covid-19 vei Mizo pahnih an thi. Mizo Welfare Association, Delhi hruaitute hnen aṭanga thu dawn danin, Sangkhumi (69) w/o C Lalnghinglova, Rengkai, Churachandpur chu nimin zing dar 4 khan AIIMS-ah a thi a; Sangliani (57), Chanakya Place-a awm chu nimin chawhnu dar 2:40 khan Holy Family Hospital-ah a thi bawk a, nizan khan Delhi-ah vui a ni.