Inbazar tawn ní siam khap

Kolasib district magistrate Lian­sangzuala Chhakchhuak chuan March 9, Thawhṭanni khan thupek chhuahin, an district chhunga ṭhenawm state nena inbazar tawn ní siam ṭhin chu khap rih a nih thu a tarlang.

Kolasib District Magistrate-in thupek a chhuahah chuan, 'Kan ṭhenawm state-te nena inbazar tawn ni-a kan siam Vairengte bazar, Saiphai bazar leh Bairabi bazarte pawh khâr tur a ni' tih a ni. Thupeka tarlan danin, Serkhan-Bagha road, Phaisen road leh Vairengte-Saihapui-V - Phainuam road-ah luh leh chhuah khap a ni a; inter state boundary kaltlang tur reng rengte chu NH-306 via Vairengte leh NH-154 via Bairabi kawngah kal tur a ni. Khualzin phur lirtheite chuan Vairengte leh Bairabi police checkgate-ah an mi phurhte hming, address leh phone number an thehlut tur a ni bawk.

Thupek bawhchhiate chu IPC Section 188 hmangin thla khat jail-a tàn leh Rs. 200 chawitir theih an ni a; Cr.PC Section 144 hnuaia thupek an bawhchhiatin mihring, mimal nun, hriselna leh himna atan a hlauhawm chuan kum khat jail-a tàntir leh Rs. 1,000 thleng chawitir theih a ni.