Aizawl district-ah sikserh vanga thi awm lo

Aizawl District Task Force and Committee for Elimination of Malaria chuan an chairman Dr Lalhriatzuali Ralte, Aizawl bawrhsap hoin nimin khan zoom kaltlangin hmalakna leh hmachhawpte an thlirho. Kum 2020 chhungin Aizawl East leh West-ah sikserh vanga thi an awm lo tih an tarlang.

Meeting-a tarlan danin, kum 2020 chhungin Health department-in district an ṭhen dana Aizawl West district hnuaiah sikserh vei mi 27 an awm a, chu'ng zinga 19 chu malaria PF a ni. Kuminah January-April, thla li chhungin sikserh vei mi pahnih hmuh a ni tawh a, PV ve ve a ni.

Aizawl West hnuaiah hian thosi hlo, Dichloro Diphenyl Tri­chloroethane (DDT) chu Annual Parasite Index-a 2 (pahnih aia tam) nei khua, Samlukhai health sub-centre hnuaia khaw pahnih - Samlukhai leh Lungseiahte thawh khatna kalpui tawh a ni a, chenna in awm zawng zawng zinga 85% kah a ni.

Kum 2020 chhungin Aizawl East district hnuaiah sikserh vei mi 15 hmuh chhuah a ni a, an zinga 11 chu malaria PF a ni. Kumin January-April chhungin sikserh vei mi pahnih hmuh a ni tawh a, PV ve ve a ni.

Aizawl East district chhungah hian North Serzawl health sub-centre hnuaia khaw pathum - Sunhluchhip, Chhanchhuahna leh North Serzawlahte thosi hlo kah thawh khatna kalpui a ni tawh.

Meeting chuan, Covid-19 hripui léng karah sikserh laka himna turin thosi lên zar uar tur te, thosi pian theihna tui tling tibo tur leh mahni in leh a vêl vawng fai turin mipui an ngen a ni.