Inkaihhruaina ṭhenkhat tidanglam

Mizoram sorkar chuan May 24, 2021 thlenga total lockdown kalpui tura inkaihhruaina a tihchhuah tawh chu nimin khan ṭhenkhat a tidanglam a; AMC area leh district khawpuia aṭanga khawpui pawn lama hnathawka chhuakte chu an riahchilh a ngai tawh dawn.

Inkaihhruaina tihdanglam ṭhenkhatte :
1. Zin haw inkhung hrangte chu ni 10 hnuah RT-PCR/TrueNat hmanga endik ngei ngei a ngai tawh a, negative-te chu inkhung zui a ngai tawh lo.
2. Home quarantine-a awmna tur hmunhma nei lote chu hotel (paid quarantine) leh sorkar/community quarantine facility-ah anmahni sensoin ni 10 chhung an inkhung ang a, an chhuah hmain RT-PCR/TrueNat hmanga endik tur.
3. Hmasawnna hnathawh, lo leh huan hna, quarry-a lung lâk, kawng laih, lei dawhte AMC area leh district khawpui páwnah khuahkhirhna awm loa kalpui theih a ni. AMC area leh district khawpui aṭangin khaw páwna hna thawh leh riahchilh phal a ni a, lockdown chhungin khawpui chhunga an kìr leh khap a ni thung.