CCCC-a awmte'n senso bill thei dawn

Covid-19 vei, community covid care centre (CCCC)-a awmte chu Mizoram State Health Care Scheme-a inziak lut an nih chuan inenkawlna senso MSHCS aṭangin pêk let theih a nih dawn thu Health & Family Welfare minister Dr R Lalthangliana'n nimin khan a puang.

Sorkar thuchhuah tarlan danin, Health Minister chuan, "Covid-19 hri kaite enkawlna tura sorkar ruahman CCC/DCHC/DCH-a awm, MSHCS hnuaia inziak lutte'n inenkawlna senso Rs. 2,00,000 thleng an bill theih thu nikum lamah order tihchhuah a ni a, sorkarin a hriatpui CCCC-a inenkawlte senso pawh a bill theih tawh dawn a ni," a ti.

Hripui vei CCCC-a enkawl, MSHCS-a inziak lutte'n inenkawlna senso MSHCS aṭanga an hmuh lêt (bill) ve theihna turin AMC Ward-VIII councillor Christina Roluahpuii Sailo chuan nimin khan Health Minister hnenah ziakin ngenna a thlen a ni.