Green Mizoram Day hman dan tur rêl a ni

State Level Sub-Committee on Green Mizoram chuan nimin khan video conferencing hmangin kumina Green Mizoram Day hman dan tur an sawiho a; Committee chairman TJ Lalnuntluanga, Environment, Forests & Climate Change (EFCC) minister-in a kaihruai.

TJ Lalnuntluanga chuan, Covid-19 hri léng mah se, thing phun chu hunbi nei a nih avang leh khawtlai chi a nih loh thu a sawi a, "Tuihna kiam zel leh sik leh sa inthlakthleng nasa avang leh, kuminah kum dang aia khawkhéng kan tawrh rei avangin kângmei nasa tak a chhuak a; chu'ngte avang chuan thing phun ngaih pawimawh a ṭul a ni," a ti.

EFCC department-in kum hmasa lam aṭangin thing ṭiak lian leh hrisel tak nei turin hma a la tih sawiin Minister chuan, "Green Mizoram Day-a phun tur ‘tall seedlings’ a bik taka ruahman a ni. Phun tam aia phun apiang hlawhtling tura enkawl chhunzawm lam ngaih pawimawh a ṭul," a ti a; kuminah kum dang aiin Mizoramin ruahtui a hmuh har thu leh kângmei a chhuah nasat thu a sawi.

Covid-19 léng avangin kum 2020 khan Green Mizoram Day chu Aizawl district-ah chuan City Forest, Hlimen-ah EFCC Minister hoin thing phun hnatlang neia hman a ni a; district hrang hrangah pawh thing phun a ni bawk.

Kuminah pawh Covid-19 léng mek vanga sorkar inkaihhruaina bawhchhe loin disterict hrang hranga Green Mizoram Committee-te chu ruahmanna siam tura tih an ni a; Aizawl district-ah chuan thing phun hnatlang neih an rél a ni.