Lunglei district-a CCCC siam dan tur rél

Lunglei DC Kulothungan A hoin May 17, Thawhṭanni khan sorkar hotute'n DC conference hall-ah sorkar puihna tel loa community covid care centre (CCCC) ruahman dan tur an sawiho.

Kulothungan A chuan, Lunglei district-ah hripui vei an pun zel thu sawiin, "Covid-19 hri veite enkawlna turin Covid care centre (CCC) hmun hrang hrangah siam a ni a, hri vei an lo pun zel avangin kohhran, YMA leh VC-te nena ṭang ruala CCCC siam a ngai a ni," a ti a; Lunglei district-ah khum 200 awm theihna CCCC siam thei tura hmalak a ngai tih a sawi.

Meeting chuan, tualchhung kohhran, hmunhma nei ṭhate hnenah Lunglei District Task Force hmingin sorkar puihna tel loa CCCC siam tura ngenna siam ni se, a copy chu kohhran headquarters ṭheuh bakah YMA leh VC-te hnenah pek ni se, an ti. Lunglei khawpuiah khum 150 tal awm theihna CCCC siam ni se, a bak khum 50 dang chu Tlabung, Bunghmun leh Lungsenah te awm thei se, tiin an rél a ni.

Lunglei district-a khua/veng tinte chu an huam chhunga Covid-19 positive-te enkawlna hmun siam tur leh enkawl thei tura inpuahchahna nei se an duh thu an sawi.

Lunglei khawpuia community quarantine centre (CQC) atana BCM tualchhung kohhran pasarih - Chanmari, Venglai, Rahsi Veng, Venghlun, College Veng, Zohnuai East leh Salem Veng ten an kohhran hall ṭheuh hman an phal tawh chu CCCC atan dil ni se an ti a; BCM hnuaia khum 10 awmna R&D Guest House chu paid CCC enkawlna atan dil ni se an ti bawk.

Ṭhutkhawmah hian Additional DC, Health department leh Police hotu te, kohhran hruaitute leh YMA, MHIP, Chanmari leh Rahsi Veng VTF hruaitute an tel a ni.