A hnathawkte vauah sorkar puh

Sorkar hnathawkte'n Covid-19 dona atana ni khat hlawh an thawh turah, thawh ve remcháng lote an department drawing & disbursing officer (DDO) hnena inhriattir tura tih chu pehhêl (indirect) chunga sorkar hnathawkte vaunaa an ngaih thu Congress party chuan an tarlang.

Mizoram Pradesh Congress Committee thuchhuah chuan, sorkarin a ngen avanga sorkar hnathawkte'n Covid-19 dona atana ni khat hlawh an thawh turah, pawisa thawh ve remchanglo turte chu an department DDO hnena inhriattir tura tih an nih thu a tarlang a, "He thil hi sorkar hnathawkte indirect (pehhêl)-a vauna, sorkar ṭanpui nana mahni hlawh thawh remchang thei lote chhinchhiah tumna a ni," a ti.

MPCC chuan, "Sorkar hian sorkar hnathawkte hi in report tura a ti a nih pawhin, ni khat hlawh thawh theite zawk hi DDO hnena in report turin ti zawk rawh se tih kan ngaihdan a ni a, a nih loh chuan sorkar hnathawkte'n an ni khat hlawh hmanga sorkar an ṭanpuina tur hi tukluih angah a ngaih theih dawn a ni," an ti a; tuna sorkarin a tih danah chuan, ni khat hlawh thawh remchang lo te, thawh ngai ti lote pawhin sorkar hlauh vangin an inhriattir ngam dawn lo tih a chiang niin an sawi.

Congress party chuan, sorkar hnathawk zingah loan rûl mek te, mi in hnuai luaha harsa taka khawsate leh natna khirh takin a tlâkbuak mek tam tak an awm thu sawiin, "Tukluih ang ziazánga ni khat hlawh thawhtir tumna hi ṭha kan ti lo hle. Pawisa thawh thei lote inhriattir tura tihna hi tidanglam leh thuai turin MNF sorkar kan phût a ni," an ti.