Vanglaini logo

Thil man tito lo turin sorkarin a hriattir Mask man tihsan vangin FIR thehlut

Mizoram sorkara Food, Civil Supplies & Consumer Affairs department chuan ni tin mamawh zuar leh dawrkaite chu an thil zawrh chheprelh lo tur leh thil man tito lo turin a hriattir. Health Service-a Food & Drugs Admi­nistration pawhin thupek chhuah­in, COVID-19 chungchang vang­a hand sanitiser (kut silna) leh face mask (hmai tuamna)-te a man pangngai aia sanga hralh khap a nih thu an tarlang.

Food & Drugs Administration thupek (circular)-ah chuan, "Tunlai khawvel hmun hrang hranga COVID-19 leng mek denchhenin Mizoram hmun hrang hranga dawr ṭhenkhat, hand sanitiser leh face mask a man pangngai (MRP) aia to uchuak taka hralh an awm tih hriat a ni a. Hei hi Drugs Price Control Order 2013 bawhchhiatna lian tak a ni a, dan zâwm lote chu dan hmanga na taka hrem an ni ang," tia tarlan a ni.

FCSCA department chuan, ni tin mamawh zuar leh dawrkaite pawh an thil zawrh chheprelh lo tur leh thil man tihsan belh loh tur­in a hriattir a, "Hriattirna zâwm lote chu The Prevention of Black Marketing and Maintenance of Supplies of Essential Comodities Act, 1980 leh The Consumer Protection Act, 2019 hmanga hrem an ni ang," a ti.

Hetih lai hian, Aizawl Civil Hospital (ACH) chhunga canteen (damdawi zawrhna)-in a man pangngai aia sang féin face mask an hralh nia hriat a nih avangin Vanramchhuangi, Chaltlang chuan nimin khan Aizawl Police Station-ah FIR a thehlut a; ACH canteen-in face mask an hralh dan chhui chiang turin a ngen.

FIR-a tarlan danin, ACH canteen-in March 9, Thawhṭanni khan face mask (medical/surgical mask) chu pakhat Rs. 40-in an hralh tih TV chanchin tharah puan a ni a; mask chu wholesale rate-in pakhat Rs. 1.50 aṭanga Rs. 2 a ni tlangpui a, a zuar chhâwngte'n Rs. 10-in an zuar ṭhin a ni.

Hetihlai hian ACH canteen enkawltute chuan company-in an tih to hnuah chiah face mask chu an tih to thu Vanglaini an hrilh a, "Company aṭangin Rs. 32 in a lo thleng a, kudam aṭanga lakna atan motor hman bakah motor aṭanga dawra phurh chho tura muṭia rawih man kan seng leh a ni," an ti.