High Court thutlukna khin lêtah CYMA-in sorkar an ngaichâng

Gauhati High Court (GHC), Aizawl Bench-in January 27, 2021-a Mizorama lui 16 kam, forest reserved ni ṭhin a ṭhiahna thupek khing lêt turin Central YMA chuan Mizoram sorkar hmalakna an ngaichâng.

Vanglaini palai zawhna chhangin CYMA general secretary Prof. Lalnuntluanga chuan, High Court thutlukna khing lêt turin hma an lak mek thu a sawi a, "Mizoram sorkarin thutlukna khin lêt an tum loh avanga thu kan neih hnuah khin lêt an tum ve leh a ni. Khing lêt tur hian sorkar a inbuatsaih mek a, sorkarin khing lêt mah se, kan khing lêt ve tho ang," a ti.

Prof. Lalnuntluanga chuan, High Court hotute an dàwr tawh thu sawiin, "Mizoram sorkarin a appeal-na an registered phawt a ngai a, chumi hnuah kan thehlut ve thei chauh dawn. Mizoram sorkar hian file an kaltir mek a, an thehluh hnuah a party-a tel ve kan dil dawn a ni," a ti a; Mizoram sorkar hmalak hunah hma an lak ve nghal tur thu a sawi.

Tarlan tawh ṭhin angin, April 30, 2021-a YMA Central Executive Committee ṭhukhawm chuan reserved forest chungchanga GHC, Aizawl Bench thutlukna khin lêt an rél a ni.

May 3, 2021 khan Vanglaini palai zawhna chhangin CYMA president Vanlalruata chuan, High Court order khin lêt tum chungchangah sorkar hnenah thu thlen an tum tawh loh thu a sawi a, "Court order hi khin lêt an tum lo tih a chiang tawh a, chuvangin, anni hnena thil thlen leh chu awmzia a awm tawh loah kan ngai," a ti.

Hetih lai hian, May 7 khan Environment, Forest & Climate Change minister TJ Lalnuntluanga chuan, High Court order chu khin lêt ngei an tum thu Vanglaini zawhna chhangin a sawi thung.

Tarlan tawh ṭhin angin, Assembly session hnuhnung berah khan INC member C Ngun­lianchunga zawhna ziaka Power & Elec­tricity minister R Lalzirliana'n a chhànnaah chuan, Tuirial HEP-a zángna­dawmna chungchangah sorkarin court sang zawkah kal tumna a neih loh thu a tarlang a, "Court order angin petitioner-te hnenah hian zangnadawmna pek dan tur ngaihtuah mek a ni," tiin a chháng a ni.