Naupang chawchhùn atana sum ruahman pawm a ni

Ministry of Education secretary Anita Karwal kaihhruaiin May 18, Thawhlehni khan naupang chawchhûn (mid-day meal) pek chung­changa India rama thu­neitu Programme Approval Board chuan, kum 2021-22 chhunga Mizorama chawchhûn tur sum ruahman nuai 2161.37 leh buhfai quintal 32,215 an pawm.

Naupang chawchhûn chungchangah hian video conferencing neih a ni a, Mizoram aṭangin School Education secretary Dr Lalzirmawia Chhangte leh director James Lal­rinchhana te bakah, official dangte an tel.

Meeting-a tarlan danin, kum 2021-22 chhunga Mizorama nau­pang chaw­chhun atana buhfai quin­tal 32,215 leh cheng nuai 2161.37 ruahman hmangin sorkar enkawl sikula inziak lut primary school naupang 91,859 leh middle school naupang 41,949-te chaw­chhun a thlàwna pek theih a ni dawn.

Kum 2020-21 chhung khan hripui avangin sikul khâr ni mah se, naupang 1,34,778 hnenah a thlàwnin buhfai leh chawhmehte sem reng a ni a, chu chu kalpui zel tur a ni.

Sorkar thuchhuah tarlan danin, kum 2021-22 aṭangin Mamit dis­trict-a sorkar sikula lût naupangte hnenah mid-day meal scheme kaltlangin buhfai ṭha (fortified rice) sem tum a ni.