Rawmi chi supply tender chhuah Tihmâkmawhah Horti-in an ngai

Horticulture depart­ment chuan tun hnaia Raw-mi (Dendrocalamus sikkimensis) chi supply-na tura tender an tihchhuah chu nimin khan thuchhuah siamin an sawifiah a; department programme awm sa aṭangin Rawmi chìnna tur vah fai a nih tawh thu leh tihmâkmawha an ngaih thu an tarlang.

Horticulture depart­ment chuan, mau/ rua tipung turin a chî emaw, tissue culture emaw, thil dangte emaw hman a ngai a, a chî aṭanga tipung tur chuan mau tàm hun nghah a ngaih thu an tarlang a, "Hetiang a nih avang hian tissue culture chu hautak deuh mah se, a tàm hun nghah kher ngai loa engtik hunah pawh hman theih technology awmchhun a ni," an ti.

Rawmi hi Mizoram ramhnuai pilrilah leh hmun zo-ah hmuh tur a awm nual thu tarlangin, "Kan rama tualṭo ngei nia hriat a ni. Kum 1977-1979 khan Mizoramah a tám tawh a. MZU lama mithiamte sawi angin kan pi leh pute pawhin tui úm, thirdéng pûm leh dâp leh a dang atante lo hmang ṭangkaiin, khawvel hmun dangah pawh hmanraw hrang hrang atan hman ṭangkai a ni," an ti. A pum a len thu te, a cháng a khàt thu te, industry-ah leh lehkhapuan siamna atan hmantlak a ni tih finfiah a nih thute an tarlang bawk.

Horticulture depart­ment chuan, thei leh thlai dang angin Rawmi pawh chìn hunbi nei a nih thu an tarlang a, "Tun hnaiah Rawmi hi Mizoramah a tám tih hriat a nih avangin Mizoram tualṭo ngei raw ṭha chìn pun a nih a, hman ṭangkai a nih theih nan department chuan hma a la a. Department programme awm sa aṭangin Rawmi chìnna tur hi a zau anga buatsaihin vah fai vek tawh a ni. Kut hnathawktute inruahmanna thlâwn lo turin a hun taka raw ṭiak chìntir hi department chuan tihmâkmawhah a ngai a ni," an ti.

Horticulture depart­ment hian May 7, 2021 khan tender notice tichhuakin, Raw-mi chi supply tur zawnna tender an chhuah a ni. Tender chháng duh tan June 1, 2021 thleng chhànna thehluh theih a ni.