Health minister-te'n hripui do an sawiho
Union Health minister Dr Harsh Vardhan hoin nimin khan hmarchhak state pariat leh West Bengal-a health minister-te'n Covid-19 donaa hmalaknate an sawiho a; Health minister Dr R Lalthangliana'n Mizoramin Covid-19 donaa hma a lak dan leh mamawhte a thlen.
Dr R Lalthangliana chuan, Mizoramah mipui ṭangrualin Covid-19 an do thu sawiin, "Kohhrante leh pawl hrang hrangte nen ṭangrualin Covid-19 veite enkawlna tur community covid care centre hmun hrang hrangah din a ni a, hei hian nasa takin sorkar a chhâwk zângkhai a ni," a ti a; hripui vei, Mizoram State Health Care Scheme-a inziak lutte chu inenkawlna senso Rs. 2,00,000 thleng bill theih a nih thu a sawi.
Health Minister chuan, Mizoram chu hmarchhak state zinga sample endik kama hma la ṭha ber dawttu a nih thu a sawi a, "Tun hnaia positive hmuh chhuah pun chhan chu sample endik a tam vang a ni," a ti.
Dr R Lalthangliana chuan Union Health Minister chu kum 45 chung lam vaccine pek tur a rang lama ngaihtuahsak tur leh, PPE leh RAT bungrua leh thil dangte dilna a thlen tawh chu chak zawka bawhzuisak turin a ngen a ni.
Hmarchhak state-te bakah, West Bengal, Gujarat, Maharashtra, Tamil Nadu, Haryana, Delhi, Karnataka, Telangana leh Andhra Pradesh-a Mizo awmte chu harsatna an tawh chánga lo ngaihsak tur leh ṭanpui tura ngenna lehkha, state health minister-te hnenah a thawn thu sawiin, ngai pawimawh turin a ngen bawk.