Saitualah Chapchar Kut lawm a ni

Nimin khan Saitual Public Playground-ah Saitual district pum huapin Chapchar Kut lawm a ni a, Lengteng bialtu MLA L Thangmawia chu Kut Pa niin, Art & Culture minis­ter R Lalzirliana chu Kut Thlengtu a ni. 

L Thangmawia chuan Saitual district thar a din hnua district pum huapa Chapchar Kut lawmna hun siam a ni chu lawmawm a tih thu sawiin, mipui kalkhawmte chu khawpui rilru pu chung zelin district thar ṭhanchhoh zelna leh district inrelbawl tharnaah rilru zau leh puitling tak pu a, district pumpui rualkhai taka a ṭhan theih nan theihtawp chhuahpui turin a sawm.

R Lalzirliana chuan Chapchar Kut chu Mizo hnam zia­rang leh hnam lam te, zai te, nun zemawi pholanna hun ṭha tak a nih thu sawiin, "Kan hnam nun zemawi tlawm­ngaihna, aia upate thuawihna, rinawmna, huaisenna, ṭhenawm khawveng, ram leh hnam min hmangaih thar tirtu atan kut hi hman ṭheuh i tum ang u," a ti. Kut lawmnaah hian hnam lam chi hrang hrang entir anih bakah intihhlimna hunte hman a ni.