Sikul leh a ram ZMC tana pek dan Sawifiah turin Muallungthu VC hriattir

Muallungthu khuaa sorkar middle school leh primary school leh a ramte Zoram Medical College tana Muallungthu VC-in Health department hnena an pek chung­changah, School Education department chuan an thil tih chu May 22, 2021 ral hmaa sawifiah

turin an hriattir.

Muallungthu P/S leh M/S bakah, a ramte ZMC tana pek chungchang sawifiah tura hriattirna lehkha hi School Education director James Lalrinchhana chuan May 15, 2021 khan Muallungthu VC President hnenah a thawn a, "...uluk taka lo en chiang a, a chhanna ziaka rawn thehlut tura ngen leh hriattir i ni e," a ti. Lehkha copy chu School Education Minister, Aizawl South-III bialtu MLA, School Education Secretary leh LAD Director hnenah pek tel a ni.

Education Director chuan, "Eng vangin nge in thil tih dan hi VC chungchang rêl thei thuneitute hnenah emaw, law court-ah emaw thlen a nih loh ang tih he lehkha tihchhuah aṭanga ni sarih chhungin a hnuaia hming ziaktu hnenah hian insawifiah tura hriattir i ni e. Hun tiam chhunga eng mah chhàna hmuh a nih loh chuan a ṭul angin legal action buaipui a ni ang," a ti.

Tarlan tawh angin, Muallungthu VC hian an khuaa sorkar P/S leh M/S ram bakah, Mauphír ram ṭin 50 hmun vela zau chu ZMC tan an pe a, an pekna lehkha chu May 14, 2021 khan Health minister Dr R Lalthangliana an hlàn a ni.

P/S leh M/S chu hmun dangah sak a ngaih dawn avangin a sakna turin hma lakpui turin Health Minister an ngen nghal a; Minister pawhin theihtawpa hma a lâkpui tur thu a hrilh a ni.

Ram pekna lehkha inhlannaah hian Health Minister chuan, "Hriselna lam ngaihtuah avanga ram zau tak Muallungthu khawtlang hruaitute'n ZMC an pe hi lawmawm hle. VC leh khawtlang hruaitute bakah hma latu Bialtu MLA chungah lawmthu ka sawi a ni," a ti.