Inhlawhna sum kan pe ṭan: Ruatkima

Kum 2021-22 atan MGNREGS (ni 100 inhlawhna)-ah kumina inhlawhna atan Rs. 77,88,33,000 hmuh a ni tawh a; job card nei mi 2,07,295 awmin, mi pakhatin ni khatah Rs. 233 zel an hlawh. Rural Development minister Lalruatkima chuan, pawisa hi hnathawktute bank account-ah an thun tan tih a sawi.

Kumin April thla chhunga MGNREGS hnuaia inhlawhna sum cheng nuai 4,600 chu May 18, Thawhlehni aṭangin beneficiary-te bank account-ah thun ṭan a ni.

Lalruatkima chuan, Covid-19 hripui léng karah RD department-in mi harsate chhâwk zângkhaina turin hma a lak thu a sawi a, "Ministry of RD-in kum 2021-22 chhunga MGNREGS hnuaia inhlawhna tur thla kal taa cheng nuai 7788.34 a rawn sanction chu beneficiary-te'n an chhawr ṭangkai theih nan chak taka bawhzui a ni," a ti.

April 2021-a inhlawhna sum job card neite bank account-a beisei aia a lut har chu pawi a tih thu sawiin Lalruatkima chuan, "SC leh ST category-te inhlawhna tur sum hi April 30, 2021-ah sanction a ni a, RD Ministry leh bank inkarah technical lama buaina/harsatna a awm avang leh Ministry lamah office kal mumal theih loh avangin job card holder-te account-ah a lut thei lawk lo a ni," a ti a; job card holder-te hriatthiamna a ngen.

RD Minister tarlan danin, Mizoram pumah chawhruala lâkin kumin April thlaah ni 11, May thlaah ni 12 leh June thlaah ni 10 inhlawh turin ruahmanna siam a ni.