LADC-in theihtawpin hripui a do - LADC EM

LADC executive member, Information & Public Relations changtu T Lalengmuana chuan nimin khan Lawngtlaia thuthar thehdarhtute a kâwm a; LADC sorkarin theihtawp chhuahin hripui do nan hma a lak thu leh district council-in sum a hmuh turte Mizoram sorkarin duhsak taka a pek thu a sawi.

T Lalengmuana hian, hripui donaah LADC sorkarin a LADC huam chhung bika hma a lak bakah, state sorkar tha tichak turin theihtawp an chhuah mek tih a sawi a, "District Hospital-a thawktu indaih lohna phuhruk nan laboratory techinician pathum LADC-in a ruai mek a, hmun hrang hrangah vaccine pete hman atan motor pek a nih bakah, Council staff eng emaw zat hri do turin an pên chhuak a ni," a ti.

T Lalengmuana chuan, hripui avanga sum harsatna thleng mekah state sorkar chuan kum kal taa budget ang chiah LADC sorkar chu budget a siamtir tih sawiin, tunah pawh LADC-in sum a hmuh turte chu an beisei phâk lohin state sorkarin a pê chhuah thu a sawi.

LADC EM hian Lawngtlai District MJA-te'n journalist pension atana an hman tur LADC sorkarin budget-a a dah, 'Grant in Aid to MJA' sum Rs. 1,00,000 chu MJA hruaitute hnenah a hlan nghal a; hripui laka invenna tur hmanruate a pe bawk.