Niminah ZMC laboratory khâr

Zoram Medical College (ZMC) laboratory-a thawk zingah Covid-19 vei an awm leh avangin nimin khan laboratory khâr a ni. ZMC director Dr John Zohmingthanga chuan, harsatna thleng avangin mipui hriatthiamna a ngen.

ZMC Director tarlan danin, Covid-19 laboratory (VRDL)-a thawk pakhat chu Covid-19 vei a ni tih May 18, Thawhlehni khan hmuh chhuah a ni a, chuvang chuan nimin chhun aṭangin laboratory tihfai leh then thianghlim a ṭul a, nilêngin laboratory khâr a ni. Nimin tlai dar 6-7 vel aṭangin swab sample endik hna ṭan leh theih an beisei.

Dr John Zohmingliana chuan, May 7-11, 2021 chhungin VRDL staff zingah Covid-19 vei mi pathum an awm avangin May 12 aṭangin laboratory khâr a lo ni tawh tih tarlangin, "Staff thawk lai mi 19 khung hran vek an ni. An aiawhin back-up team chuan May 13 aṭangin sample test an chhunzawm a, amaherawhchu, vanduaithlak takin back-up team zingah positive hmuh chhuah a nih leh tâk avangin vawiin (Nilaini) aṭangin an vaiin quarantine ṭan an ni," a ti.

ZMC Director chuan, swab sample endik tur a tam em avang leh thawktute'n harsatna an tawh avangin sample la endik loh sang tél a awm mek thu leh test report pek theih hun pawh a tlai loh theih loh thu a tarlang a; theihtawp an chhuah mek thu a sawi bawk.