Thil man khuahkhirh dan tur sawiho

Commerce & Industries minister Dr R Lalthangliana hoin nimin khan a pisaah Covid-19 lêng vanga sa, thlai leh thei man to lutuk khuahkhirh dan tur sawiho a ni.

Dr R Lalthangliana chuan, lockdown laia dawr hawn leh bazara thlai, thei leh sa zawrh dan tur ruahmanna chu a tìrah buai deuh mah se, a hnuah chuan a felfai ṭhaa a hriat thu a sawi a, "Mipui pawhin inkaihhruaina an zâwm ṭha sawt hle tih a hriat a, a lawmawm tak zet. Thlai, thei leh sa mante hi mipui dâwl zawh tâwka ruahmanna siam a ṭul a ni," a ti.

Ṭhutkhawmah hian kar hmasaa bazara sa, chawhmeh leh thei mante thlirho a ni a; Covid-19 lèn chhunga sa, chawhmeh leh thei man bithliah turin Aizawl DC kaihhruai committee din an rêl.

Meeting-ah hian Horticulture Deve­lopment Board vice chairman Prof. F Lalnunmawia, MLA, CI secretary Esther Lalruatkimi, DMR secretary Lalbiaksangi, Aizawl DC Lalhriatzuali Ralte, SP C Lalruaia, Horticulture director Elizabeth Saipari leh Aizawl City Local Council Association aiawhte an tel a ni.