Ram hruaitute an bialah che chhuak

MLA leh councillor-te chu Covid-19 kaihhnawihah ṭanpuina pein an che chhuak zel a, nimin khan kawng hrang hrangin hma an la.

Lunglei West bialtu MLA C Lalrinsanga chuan a bial chhung veng pakua-a mi harsate ṭanpuina atan Rs. 2,50,000 VLTF-te hnenah a hlan. VLTF-te hian mi harsa leh ṭanpui ngaite thlang chhuakin a ṭul angin an chhawmdawl ang.

Palak biatu MLA KT Rokhaw chuan a bial chhunga BPL leh AAY chhungkua zawng zawngte chu MLA fund aṭangin June thla quota buhfai a khulsak dawn a, chuta tana sum sên ngai Rs. 3,50,000 chu Siaha DCSO hnenah a pe tawh. KT Rokhaw chuan, "Mi rethei leh harsa zawkte'n MLA fund rualkhai taka an chan theihna atan he ruahmanna hi siam a ni," a ti.

Champhai North bialtu MLA Dr ZR Thiamsanga chuan a bial chhunga chhuanchham an awm palha sem turin nimin khan veng 15 VTF-te hnenah buhfai ip 70 a sem.

Aizawl North-II bialtu MLA Dr Vanlalthlana chuan nimin khan a bial chhunga kum 18-44 inkarte vaccine pekna hmun Ramhlun Vengchhak Presbyterian Kohhran hall a tlawh a, thawktute ei leh in senso atan pawisa a hlân.

Aizawl South-I bialtu MLA C Lalsawi­vunga pawhin tun hnai khan Bethlehem Veng leh Bethlehem Vengthlanga Covid-19 vei chhungkuate tan buhfai, dailuah leh tél a pe. Veng pahnihah hian African Swine Fever ven nan bleeching powder tam tham tak a pe bawk a; tun hnaiah vawk 200 chuang a thi tawh a ni.

AMC Ward-IX councillor B Lalawmpuii chuan a bial chhunga community covid care centre leh task force-te a tlawh kual a, an mamawh tur thil hrang hrangte a pe a ni.