Muallungthu VC-te thutlukna Páwl hrang hrangin dem

Muallungthu V/C-in an khuaa sorkar primary school leh middle school leh a hmunhmate Zoram Medical College tana an pe chu an dem thu leh ṭha lo an tih thu páwl hrang hrangin thuchhuah siamin an tarlang.

ZPM Ṭhalai chuan, sikul ram neitu School Education department ráwn miah loa sorkar P/S leh M/S ram ZMC tana Muallungthu VC-in an pe chu School Education Minister zah lohna lian taka an ngaih thu an tarlang a, "Muallungthu VC-te'n an rorel danah khawtlang mipui ai an awh zo lo hlein kan hria," an ti.

Muallungthu VC-te thil tih dan chungchangah School Education Minister a la ngawi tlat tih sawiin ZPM ṭhalaite chuan, "Zawhna tam tak a awm laia demna thu leh zirlaite thlavang hauhna emaw, sikul leh ram humhalhna thu emaw a la chhâk chhuak miah lo pawh hi pawi kan ti," an ti a; MNF sorkar hnuaiah tute emaw sum siamna tur nia ngaih theih tura central aṭanga project hâi luhna atana zirna-in hmunhmáte phalraia a awm mek chu pawi an tih thu an sawi bawk.

ZPM, Muallungthu Unit pawhin thuchhuah siamin, "Muallungthu Mauphir ram leh M/S tlang VC-te'n mipui leh NGO-te ráwn loa sorkar/Health department an lo pe mai hi keini ZPM Unit chuan ṭha kan ti lo a, he an thutlukna hi mipuite ráwna siamṭha leh turin kan phût a ni," an ti.

National Students' Union of India (NSUI), Mizoram State chuan, Muallungthu V/C-in School Education department ráwn loa ZMC tana an khaw sikul hmunhma an pe te, School Education department-in sawifiah tura Muallungthu VC an hriattir leh law court hial thlen an tum phahte chu pawi an tih thu an tarlang.

NSUI chuan, ram inpek leh ZMC zauh chungchangah Muallungthu VC, School Education leh Health department-te chu inbe fel vat turin an phût a ni.

Muallungthu VC-in sikul hmunhma ZMC tana an pe chu hriatthiam harsa an tih thu MZP-in an tarlang tawh a; Mizo Students Union erawh chuan thuchhuah siam mah se, demna leh duh lohna thu an tarlang lo thung.