CMRF sum nawr chhuah hi Mipui tan hnehna a ni- Cong

Congress party chuan, Covid-19 léng vanga inkhuahkhirh leh inkhàrkhip vanga chhuan­-chhama awm mekte chhawmdawlna atan Chief Minister Relief Fund for COVID-19 aṭanga Rs. 91,50,000 pek chhuah a ni dawn ta chu mipui tan hnehna a nih thu an tarlang a; eptu party-te leh mipuiin chanchinbu leh social media kal tlanga an nawr chhuah a nih thu an sawi.

Covid-19 lockdown vanga harsatna tâwkte chhawmdawlna atan CM Relief Fund aṭangin cheng nuai 91.50 pek a nih tur thu hi May 17, 2021 khan sorkar thuchhuahin a tarlang a ni.

MPCC chuan, "Hei hi opposition party-te leh Mizoram mipui pawhin CM Relief Fund hman dan tur dik tak nia kan ngaih, nasa taka kan nawr ṭhin kha a ni a, chanchinbu leh social media hmanga mipuiin kan nawrna chuan rah ṭha tak a chhuah ta a ni," an ti.

CMRF-in mi rethei hnen a thleng ve dawn ta chu lawmawm an tih thu sawiin MPCC chuan, "Mizoram mipuiin eng emaw chen chu hnehna kan chang ta tihna a ni. Mipuiin kan nawr nat phawt chuan he MNF sorkar hi thil ṭha ti turin a la nawr kal chawp theih tih a chiang hle," an ti a; Mizoram sorkar dinhmun a lan chian thu an tarlang.

Congress party chuan, April-July, 2020 chhunga CMRF-a sum chhùn luh cheng vbc. 20 chuang aṭanga cheng vbc. 16 chuang hman danah mipui an lungawi loh avangin mipuiin sum an thawh ṭha duh tawh lo a, nikum July thla hnuah kum khat chhungin cheng vbc. 3 vel chauh a lut tawh tih an sawi a, "CMRF for Covid-19 hi sorkar thilah hman ni tawh lo se la, relief fund a nih ang ngeiin, mi harsate chhawmdâwl nan hman zel ni tawh rawh se," an ti.