Online class neih dan en chian an rêl
School Education department hotute chuan an minister Lalchhandama Ralte hoin nimin khan Google meeting hmangin zirna kalpui dan tur leh hmalak dan tur an sawiho a; Directorate of School Education-in online class neih dan phung lo bih chiang se, an ti.
Meeting-ah hian, hripui lêng avangin zirna pangngai neih theih loh dan te, a theih ang anga online class kalpui tura hriattirna chhuah a nih thu leh sikul eng emaw zatin an kalpui thute an tarlang. Online class chu sikul tam tak tan neih theih a nih loh avangin nikum lama tih tawh angin, secondary school tan MBSE-in weekwise plan an siam leh elementary school tan SCERT-in alternative academic calendar an siam chu hman leh tum a ni.
Mimal sikulte'n zirna pangngai kalpui theih loh lai pawhin zirtirtu hlawh leh thil dangah senso a san tho avang leh online-a zirtirna an kalpui tho avangin tuition fee a full-a lâk theih an duh thu an thlen chungchang an sawiho a; May 25, 2021-ah a kaihhnawih zirlai pawl, zirtirtu pawl leh department officer-te inrâwn khawm ni se, an ti.
MBSE hotute chuan, HSLC leh HSSLC result chu a hmáwr bâwk ṭêp a nih thu leh, India ramah result tichhuak hmasa pawl an ni thei dawna an hriat thu an sawi a; Covid-19 positive vanga exam chhunzawm thei lote chu supplementary exam ruala exam ve tura an ruahman thu an
sawi bawk.
Primary school aṭanga HSS thlenga headmaster leh principal neih loh vanga sikulin harsatna an tawhte sutkian nan P/S headmaster promotion-a hnawh khah tur post 150 chuang atan ACR khawn mek a nih thu leh, post 120 chuang chu limited departmental exam (LDE) hmanga hnawhkhah turin MSSSB-ah thawn tawh a nih thu an tarlang.
M/S headmaster post 113 promotion-a hnawhkhat turin ACR khawn mek a nih thu leh LDE a hnawhkhah tur pawh MPSC-ah thawn a nih thu te, H/S headmaster leh HSS principal post ruak hnawhkhah tur pawh buaipui a nih thu te, post ruakte hnawhkhah thuai a nih theih nan chak zawka bawhzui zel a ṭul thute an sawi bawk.
Meeting-ah hian School Education secretary Lalzirmawia Chhangte, School Education director James Lalrinchhana, SCERT director Laldawngliani Chawngthu, MBSE chairman JH Zoremthanga leh hotu dangte an tel a ni.