Mi 120 an fihlim ve leh

Zoram Medical College (ZMC) Covid-19 Laboratory-a May 31, Pathiannia mi 130-te swab sample endik result hriat tawh chinah mi 120-te chu Covid-19 hripui lakah an fihlîm. Hetih lai hian, Mizoram luhka hrang hranga screening point-a enfiah zat chu nuai khat a chuang tawh.

ZMC Covid-19 Laboratory-ah hian Pathiannia sample endik zinga 10 chu he thu ziah lai hian hriat a la ni lo a; nimin khan mi 130-te swab sample endik leh niin, chu'ngte pawh chu result hriat hman a ni lo.

State Referral Hospital (SRH)-ah nimin khan Covid-19 kai rinhlelh thilah mi 12 dah luh an ni a, phai aṭanga rawn haw thar vek an ni. An zinga mi 11-te swab sample chu nimin khan laka endik a ni a, pakhat erawh chu vawiinah endik a ni ang. SRH-ah hian nimin tlai dar 5 thleng khan mi 21 an awm a, Risk Ward-ah mi 13, Make Shift ICU/SARI Ward-ah mi pakhat leh Holding Ward-ah mi pasarih dah an ni.

Hetih lai hian, state pawn aṭanga Mizorama lut tur Mizoram luhka hrang hranga screening point-a enfiah zat chu nimin tlai dar 5 thleng khan mi 1,00,363 an ni. Pathianni tlai dar 5 hnu lama enfiah zat chu 1,252 an ni a, quarantine centre-ah dah thar mi 455 leh home quarantine-a dah thar mi 75 an awm a; rapid antibody test (RAT)-a endik mi 489 an awm bawk.