Dy.CM-in MCCF hun a hmanpui

Mizoram Cancer Care Foundation (MCCF) chuan nimin khan an din champha vawi 9-na Mizoram State Archives Hall-ah an lâwm a, deputy chief minister Tawnluia'n a hmanpui.

Tawnluia chuan, cancer natna vei tawh a nih thu leh Pathianin a tihdam vanga a lawm thu sawiin, "Cancer vanga natna leh hrehawm tam tak tuarte leh thihna tâwk chhungkuate ka tawrhpui tak zet a ni," a ti a; nunphung hrisel, ei tur thianghlim leh zûk leh hmuam tih loh inzirtirna uar leh zuala kalpui a pawimawh thu a sawi.

Deputy Chief Minister chuan, Mizoram sorkarin cancer veite enkawlna kawngah theihtawp a chhuah thu a sawi a, "Zemabawka cancer enkawlna khawl hlui tawh thlakna tur sum kan Chief Minister-in min pe dawn a, hma kan la mek a ni," a ti. MCCF general secretary Lalmalsawmi sawi danin, MCCF-ah hian member 1,400 vel an awm mek a, March 19, 2019 aṭanga nimin thleng khan an member mi 32 an thi a ni.