Sikul admission tih hun tur la hriat loh
Covid-19 hripui léng leh inkhàrkhip vangin Mizoramah sikul admission tih theih hun tur a la chiang lo a, boruak awm dan azirin tih theih thuai beisei a ni.
School Education director K Lalrinzuali chuan Vanglaini palai zawhna chhangin, sikul admission chu Covid-19 boruak vangin tih a la remchan loh thu a sawi a, "Kan boruak tawnte azirin kan la ngaihtuah ang a, tih theih thuai kan beisei; tun dinhmunah chuan tih theih a la ni lo," a ti.
Pawl 11 admission chungchanga sikul ṭhenkhatin media-a advertisment an tihchhuah chungchanga zawhna chhangin K Lalrinzuali chuan, "Admission tih phal a la nih loh thu kan chhuah hnuaah lo ti nia kan hriatte chu kan bia a, kan hrilh nghal zel. TV lama lo in advertise-te an awm a, mahse, kan ûm zui a, chu'ng ho chu advertisement tih nana pawisa lo pe tawh laklawhte an ni hlawm,'' a ti a; sikul hrang hrangte chuan admission tih rih loh tura sorkar thuchhuak an zâwm ṭhaa an hriat thu a sawi.
School Education department chuan May 16, 2020 khan sorkar leh mimal higher secondary school zawng zawngte chu Covid-19 léng leh inkhàrkhip avangin pawl 11 admission la ti rih lo turin a hriattir a ni.