Covid-19 léng lo se Mizoram Treasury Khâr hial a ngai tawh ang - BJP President

BJP Mizoram Pradesh president Vanlalhmuaka chuan, Covid-19 hripui léng lo se chuan Mizoram sorkarin Treasury a khâr hial a ngaih tawh tur thu sawiin, "Mizoram sorkar hian sum âtchilh lo hian harsatna kan tawh lohna atan ruahmanna fel tak siam rawh se," a ti.

Vanlalhmuaka hian nimin khan BJP pisaah thuthar thehdarhtute a kâwm a; Covid-19 vangin Mizoram sorkarin state sum a sênna tur tam takah séng loin, central sorkar zar a zo mek thu sawiin, "Mithiam ṭhenkhatte sawi dan chuan, Mizoram sorkar Pu Zoramthanga kaihhruai hnuaiah hian normal financial year hmang chho ni ngat ila Treasury khâr a ngaih hial tawh a rinawm," a ti a, ruahmanna mumal tak siam a, langtlang taka ram kaihruai turin Mizoram sorkar an phût tih a sawi.

Covid-19 avangin state sorkar chungah central sorkar a thilphal hle nia sawiin Vanlalhmuaka chuan, "State sorkara sum a pek tur ang ang hi chu state sorkar a harsat hlauh avangin an dil miah lo pawhin a pe zung zung. Covid-19 vang hian PMGKY hnuaiah state sum sên tur tam tak state sorkar hian séng loin, faisa ringin kan state sum kan save mek zawk. Free ration mai ni loin, DBT account hrang hrangah pawisa vaibelchhe eng emaw zat Mizoram mipui account-ah a lut mek a ni," a ti.

Mizoram BJP President sawi danin, MGNREGS hnuaia sum hmuh tur chu Mizoram sorkarin utilisation certifcate a pek hleih theih loh avangin sorkar laipuiin a sanction thei lo a, mahse, Covid-19 avangin cheng vbc. tam tak a rawn pe tho a ni. State dang nena khaikhinin, Mizoram sorkarin Covid-19 dona atan sum a hmang tlem. State dangah chuan sor­kar hnathawkte'n hma an táwng a, a enkawlna a hautak. Mizoramah chuan task force-te'n hma an hruai a, sorkarin sum tam tak a hum phah a ni.

Sorkar laipuiin thàl theih turin cheng vbc. nuai 20 a ruahman thu sawiin Vanlalhmuaka chuan, "Board 14 a dinte hi ṭhiatin, board pakhat, mi thiam tak tak awmna siam se. Chu'ng mite chuan ruahmanna fel tak siamin, sum hnuh luh ve tum ni se a duhawm. Tunah hi chuan Mizoram sorkar hian ruahmanna mumal a nei lo. Mi nuai 11 vel awmna, mihring kaihhruai leh enkawl nuam bawk si, ram leilung ṭha leh ruahtui dawng ram hi ruahmanna mumal tak siam chuan ṭha taka enkawl theih a ni," a ti.

BJP President chuan Covid-19 léng mekah sorkar laipui hmalakna fakin, "Covid-19 vanga khawvel sorkar ropui leh chakte an tâlbuai laiin, kan PM Narendra Modi remhriatna leh finna avang­in Covid-19 do tur­in India mipui vbc. 130 chuan thawhhona ṭha tak kan nei. Mi thiam tam takin hripuiin India ram a thlen hunah chuan India chu khawvel tan buaipuiawm tak tura an lo sawi lâwk ram a ni," a ti a; Covid-19 chuan India chu khawvel ram ropui leh leader ni turin a vawrh chhuak ta zawk niin a sawi.

Vanlalhmuaka hian May 30, 2020 khan prime minister Narendra Modi kaihhruai sorkar term hnihnain kum khat a tlinna a nih thu a sawi a, kum khat chhunga sorkar laipui hmalakna hrang hrang a tarlang a ni.