KHAWTHLIR

CM Relief Fund
Chief Minister's Relief Fund for Covid-19 ah nimin khan pawl leh mimal pasarihte'n Rs. 3,29,000 an chhûng lut a; pawisa petute zingah Mizoram State Cooperative Marketing and Consumers' Federation LTD. (MIZOFED)-a thawkte'n ni khat hlawh an thawh khawm Rs. 1,64,000 leh Mizoram Chemist and Druggists Association thawh Rs. 1,00,000 a tel. Nimin thlenga CMRF-a sum lut tawh chu Rs. 23,35,14,954 a ni a, Rs. 22,25,10,970 hman tawh niin, hman loh Rs. 1,10,03,984 a la awm.

Hripui vei tawh lo
Minister R Lalzirliana chu Covid-19 a vei tawh lo tih nimin khan finfiah a ni. R Lalzirliana hi Covid-19 positive a ni tih May 11, 2021 khan hmuh chhuah a ni a, a rual hian a nupui pawh hmuh chhuah a ni. Natna a lan chhuah avang leh oxygen a hniam deuh avangin May 13 khan May 8-a Covid-19 vei tih finfiah tawh an fapa nen, an pathumin SRH-ZMC-ah dah luh an ni a; nimina an swab sample endik lehnaah an pathumin hripui an vei tawh lo tih finfiah a ni.

Tuiah tla hlum
Nimin chhun dar 11:30 vel khan Mimbung khaw mi pathum chu Mizoram leh Myanmar inrìna, Tuisa luiah pûma an chuan laiin an chesual a, mi pahnih - Chinrohlun s/o Ginkhanthang leh Chinmuankum d/o Liankhenmang te an thi. Mi pakhat erawh chu chêtsualna hmun hnaivaia awmte'n an chhan chhuak hman a ni.

SRH-ah mi 16-in Ventilator hmang
State Referral Hospital-ah nimin tlai dar 5 thleng khan Covid-19 vei enkawl mi 166 an awm mek a, chu'ng zinga mi 31 chu ICU-ah enkawl niin, mi 16 chu ventilator hmantir mek an ni. SRH-ZMC Bulletin tarlan danin, nimin khan hripui vei SRH-ah mi 17 dah luh an nih laiin, mi 13 chhuahtir an ni a; enkawl mek mi 166 zinga 135 chu ward-ah an awm a ni.