SBI-a thawkte'n ZMC-ah morgue van an pe

State Bank of India (SBI) chuan State Referral Hospital (ZMC)-a Covid-19 vanga thite ruang phurhna tur morgue van an pe a; nimin khan SBI regional manager LP Lalchangkima'n Health minister Dr R Lalthangliana hnenah a hlân.

Morgue van inhlanna hi Secre­tariat tualah neih a ni a; Health Minister chuan, "Mizorama SBI-a thawkte bakah, Bengaluru-a Mizo SBI officer-te'n sum thawh khawma morgue van an lei hi a ropui a, ram leh hnam hmangaihna thinlung aṭanga chhuak a ni," a ti a, Mizoram tana thawhlawm an thawh chuan a rilru a hneh thu a sawi.

ZMC-a oxygen siamna, oxygen generating plant kháwl chhia siamṭha turin a siamtu HOSCO Pvt. Ltd., Kolkata chu nikum lam aṭanga an chah tawh thu sawiin R Lalthangliana chuan, "Covid-19 hri léng chhuanlamin rei tak an lo kal thei lo a, na deuh hleka ka nawr avangin tun kar tìr khan engineer an rawn thleng. Khawl chhia hi siamṭhat a ni tawh a, nimin chawhma khan trial run (enchhin) neih a ni," a ti.

Dr R Lalthangliana chuan, oxygen generating plant a chhiat pawha siam thei turin Mizorama technician-te chu training pe turin HOSCO engineer-te a ngen nghal thu leh training an pek dawn thu a sawi bawk.

LP Lalchangkima pawhin thu sawiin, morgue van pek chu cor­porate social responsibility hnuaia tih dawn chuan file kal kual chhung a rei ṭhin avangin Mizorama SBI staff-te'n pawisa an thawh khawm thu a sawia, "Bangalore-a Mizo SBI officer-te pawhin Mizoram tan an rawn thawh ve a, Mizoramin Covid-19 hripui a dona kawnga kan ṭangkai ve theihna a nih beiseiin hetiang hian hma kan la a ni," a ti.

Morgue van inhlannaah hian Aizawl South-III bialtu MLA Prof. F Lalnunmawia, ZMC director Dr John Zohmingthanga leh Health department hotute an tel.