Covid-19 chi thar Mizoramah a luh tawh rin a ni; finfiahna erawh a la awm lo
Integrated Disease Surveillance Prog-ramme (IDSP) state nodal officer Dr Pachuau Lalmalsawma chuan, Mizoramah Covid-19 chi thar a luh tawh an ring tih a sawi a, "Finfiahna erawh a la awm lo," a ti.
Vanglaini palai zawhna chhángin Dr Pachuau Lalmalsawma chuan, Mizoramah Covid-19 chi thar a luh leh luh loh finfiah theih a ni lo niin a sawi a, "Covid-19 chi thar finfiah theihna laboratory 10 chiah a awm a, Mizoramin kan hnaih ber National Institute of Biomedical Genomics (NIBMG), West Bengal-ah kan thawn ṭhin," a ti a, swab sample 326 thawn a nih tawh thu a sawi.
Dr Pachuau Lalmalsawma chuan, sample thawn tawh 326 aṭangin sample 69 endik result an dawn tawh thu sawiin, "Result kan dawn tawhte chu Covid-19 chi thar a ni lo vek a, hei vang hian Mizoramah hripui chi thar a la rawn lut lo, tih ngawt theih a ni lo. Result kan hmuh tawh ho hi second wave ṭan tirh lama mi a ni," a ti.
ISDP Nodal Officer chuan, Mizorama Covid-19 vei tharte symptom neih dan, inkài chhàwn awlsam dan leh thihpui ṭhenkhatte aṭangin Covid-19 hri thar chu Mizoramah a luh tawh ngei an rin thu sawiin, "Finfiahna erawh a la awm lo," a ti a; Indian variant pawh ram dang eng emaw zatah a darh tawh avangin Mizoram pawh a him bik a rinawm lo tih a sawi.
Dr Pachuau Lalmalsawma sawi danin, Covid-19 hri thar lènna hmun aṭanga Mizorama lutte chu sample endikah negative mah se, Berawtlangah khung hran zel an ni a, ni sarih hnuah RT-PCR hmangin an sample endik leh ṭhin a ni.