Covid-19-a Aizawl district dinhmun

Health & Family Welfare hnuaia Integrated Disease Surveillance Programme (IDSP)-in Aizawl district leh Aizawl khawpuia Covid-19 hri vei pun dan leh dinhmun a tarlan danin, May 1-18, 2021 chhungin Aizawl district-ah Covid-19 positive hmuh chhuah mi 2,188 an awm.

Kumin May 1-18 inkara Aizawl district chhung khua leh veng hrang hranga Covid-19 vei hmuh chhuah thar mi 2,188 zinga mi 1,137 (51.97%) chu natna (symptom) lang chhuak an ni a; mi 2,188 zinga 2,108 chu Aizawl Municipal Corporation huam chhunga mite niin, 96.34% a tling a ni.

IDSP-in a tarlan hi May 18 thlenga dinhmun a ni a, May 19-a swab sample endikah mi 192 hmuh chhuah belh a ni. Mi 192 hmuh belhte hi a hnuaia table, Aizawla hripui vei tam zualna zingah tarlan tel ni mah se, belh tel a ni lo.