Harsatna siam lo turin DC-in a ngen

Khawzawl district bawrhsap Zothanmawia chuan May 19, Nilaini khan National Highway no. 6 kawngpui laih dan tur duh loa lungawi lohna lantirtu Kawlkulh leh Dulte khawtlang hruaitute a kâwm a; thil tihdanglam theih a awm tawh loh thu sawiin, harsatna thlen thei záwnga hma la lo turin a ngen.

Zothanmawia chuan, NH-6 laih dan tur chu Central lamin an tihfel tawh avangin tihdanglam theih a awm tawh loh thu a sawi a, "Theihtawp chhuahin in duh dante in tilang tawh a, tunah hian tihdanglam theih a awm tawh loh avangin in dinhmun pawm thiam a, harsatna thlen thei záwnga hma la lo turin ka ngen che u a ni," a ti a, awmze nei loa boruak tihso­san a hlauhawm thu a sawi.

Kawngpui chu sorkar laipui sum hmanga thawh tur a nih thu sawi­in Bawrhsap chuan, "A laih dan tur pawh Central sorkar buaipui a ni a, kawng laih tur ṭha taka ṭâwiawm hi khua leh tui kan nihna anga kan mawhphurhna a ni. Media lama thuchhuah siam a intawng ang chite pawh tihtawp a hun tawh. Sorkar laka beisei leh duh in neihte chu ka thlensak theih reng a ni," a ti.

Khawzawl SP PC Lal­chunglura pawhin thu sawiin, lungawi lohna lantir mekah dan bawhchhiat­na a thlen theih dan leh dan bawh­chhiatna­in nghawng ṭha lo a neih theih dante a sawifiah a; additional DC Lalrohlua'n ram lâk (land acquisition) chungchang a sawifiah bawk.

Khawzawl DC, SP leh Additional DC-te hian Puilo khua pawh an tlawh a, khawtlang hruaitu an kâwm a ni.