PFMS-in bank 2 a pawm loh vangin Scholarship pek theih a la ni rih lo

Mizoram Scholarship Board (MSB)-in tun May thla chawhma lama pre-matric scholarship pêk chhuah a tum chu Public Financial Management System (PFMS)-in bank accept (pawm) theih loh a neih avangin sem a la ni lo.

MSB hotute chuan Vanglaini palai zawhna chhangin, pre-matric scholar­ship sem turin an inpeih tawh tih an sawi a, "Tunah hian India Post Payments Bank (IPPB) leh Apex Bank-te hi PFMS hian a accept thei tlat lo a, an hotute nen kan buaipui mek. Hei hi pre-matric scholarship kan sem chhuahna tura min dâltu ber a ni," an ti a, bank dangah harsatna a awm loh thu an sawi.

Bank pahnih tel lo pawhin scholarship chu sem theih tho a ni tih an sawi rualin MSB hotute chuan, "Heng bank pahnihte hi zirlai 500 velin scholarship dil nan an hman avangin tihsan kan hreh a, a ruala pek chhuah theih dan tur kan buaipui mek a ni," an ti.

MSB nodal officer Lalmuankima Sailo chuan, post-matric scholarship chu Finance department hnenah release order tichhuak tura dilna thehluh an tum thu a sawi a, "Secretariat kaltlang loa direct-a thehluh chi a ni lo a, secretariat lam office kai hun kan nghak mek a ni," a ti bawk.

Tarlan tawh angin, MSB chuan pre-matric scholarship diltu mi 12,000 vel tan cheng nuai 460 vel an nei tawh a, May thla tìr lamah pek tum mah se, bank leh PFMS inkarah harsatna an nei a ni. Post-matric scholarship chu mi 32,000 velin an dil a, cheng nuai 3,400 vel mamawh niin, Finance department chuan first instalment tur cheng nuai 1,760 vel a kawl mek a ni.