Ram hruaitute an bialah che chhuak

MLA leh councillor-te chu Covid-19 kaihhnawihah ṭanpuina pein an che chhuak zui zel a, nimin pawh khan kawng hrang hrangin hma an la.

Minister of state TJ Lalnuntluanga chuan nimin khan a bial, Champhai South huam chhunga khua/veng tina village task force-te hnenah buhfai ip 200 a sem. Buhfaite chu VTF-te'n an huam chhunga chhungkaw harsate hnenah an sem leh ang.

Minister of state Robert Romawia Royte chuan nimin khan a bial, Aizawl East-II huam chhunga AAY leh PHH chhungkua zawng zawngte ration buhfai lak tur chu kumin chhung zawng ama sumin a khulsak dawn tih a puang.

East Tuipui bialtu MLA Ramthanmawia chuan nimin khan a bial chhunga khaw hrang hrangah buhfai ip 270 a sem. Buhfaite hi ration card nei lo chhungkaw 357-a mi 1,112 leh Myanmar aṭanga ráltlan mi 1,030-te tana ruahman a ni a, khaw hrang hranga village task force-te'n dawng àwma an ngaihte hnenah sem a ni ang. Ramthanmawia hian vawiinah ṭanpuina pek leh a tum a, a biala VTF hrang hrang hnena pek tur Rs. 1,83,000 a ruahman a ni.

Aizawl South-II bialtu MLA Lalchhuan­thanga, AMC ward XVIII councillor Malsawm­zuala Ralte leh ward XIX councillor Baryl Vanneihsangi te chuan nimin khan South-II leh ward XVIII huam chhunga 3rd MAP, Mualpui hmun an tlawh a; commandant Lalzahngoa leh officer dangte nen an inkawm bakah, hripui dona hmanraw chi hrang hrang an hlân.

MLA leh councillor-te chuan, 3rd MAP, Mualpuiah hripui vei an awm tawh rih lo leh African Swine Fever laka an fihlim rih chu lawmawm an tih thu an sawi a; MAP-in anmahni an mamawh a nih chuan an inhawn reng thu leh thawhhona ṭha neih zel an duh thu an sawi a ni.

Aizawl West-I bialtu MLA Zothantluanga pawhin nimin khan a bial veng hrang hranga chhuanchhamte pek turin local task force-te hnenah buhfai ip nga, alu ip hnih, dailuah ip hnih leh purunsen ip khat ṭheuh, neutrela leh Covid-19 kaihhnawih hmanraw chi hrang hrang a pe. A biala taxi welfare-te hnenah Rs. 7,000 ṭheuh, Rangvamuala police duty-te hnenah Rs. 2,000 leh theitui, Agape Camping Centre-ah buhfai ip li a pe bawk.

Mizoram Youth Commission chairman Dr Vanlalṭanpuia, MLA chuan nimin khan a bial Lungei North bial chhunga Zote South mi, Aizawla tangkhang mek mi 10-te chu a lirtheiin a thawn haw. A bial chhung Ramlaitui khaw nula, Covid-19 positive avanga Durtlang BSUP CCC-a awm mek a tlawh bawk a, tui thianghlim in tur leh ei tur eng emaw zat a pe bawk. Dr Vanlalṭanpuia hian Mamit bialtu MLA H Lalzirliana nen Khatla leh Bungkawn LTF-te hnenah Rs. 5,000 ve ve leh hmanraw hrang hrang an pe bawk a ni.

AMC ward VIII councillor Christina Roluahpuii Sailo chuan a bial chhunga veng pathum - Armed Veng, Armed Veng South leh Chite Vengin an inenkawl ṭâwm community covid care centre (CCCC), Horticulture Complex, Chite chu nimin khan a tlawh. RIPANS nen an thawh dunna aṭanga siam hand sanitiser leh disinfectant eng emaw zat a pe a, medical duty-te leh task force duty-te ei tur chi hrang hrang a pe bawk.